کۆمەڵە کەسێک هەن کە ڕێگەیان پێ نادرێت شایەتی لە دژی یەکتری بدەن، بە پێچەوانەوە تەنھا دەتوانن شایەتی بدەن بۆ بەرگری کردن لە یەکتر. ئەوانیش بریتین لە :
ژن و مێرد : ھاوسەرەکان بۆیان نییە شایەتی بدەن لە دژی یەکتر تەنھا لە کاتێکدا نەبێت کە یەکێکیان تۆمەتبار بێت بە تاوانی زینا، یان تاوانێکی ئەنجامدابێت لە دژی هاوسەرەکەی یاخوود موڵک و ماڵی هاوسەرەکەی، یان لە دژی منداڵەکانیان.
اصول و الفروع : دایک و باوك و نەنک و باپیر ناتوانن ببنە شایەت لە دژی منداڵ و نەوەکانیان، منداڵ و نەوەکانیش ناتوانن ببنە شایەت لە دژی دایک و باوک و نەنک و باپیریان، تەنھا لە کاتێکدا نەبێت کە تۆمەتبار بن بە ئەنجامدانی تاوانێک لە دژی یەکتر یان دژی موڵک و ماڵی یەکتر.
ئەو کەسانەی کە بەهۆی پیشەکەیانەوە درک بە نهێنیەکی سەردانیکەرانیان دەکەن: بۆ نموونە دکتۆر و پارێزەر ناتوانن ببنە شایەت لە دژی نەخۆش و بریگرتەکانیان و ئەو نهێنیانەی بەهۆی پیشەکەیانەوە درکیان پێ کردووە ئاشکرای بکەن و لە دژیان بەکاری بهێنن.
وە بێگومان ئەو کەسانەی کە لە سەرەوە ئاماژەمان پێدا دەتوانن شایەتی بدەن بۆ بەرگریکردن لە یەکتر و ئەگەر لەکاتی شایەتیداندا بەشێک لە وتەکانیان بەرگری بوو لە تۆمەتبار وە بەشێکی تری لە دژی تۆمەتبار بوو. ئەوا ئەو بەشەی دژی تۆمەتبارە بە هەند وەرناگیرێت و تەنیا کار بەو بەشەی وتەکانی دەکرێت کە بەرگری کردووە لە تۆمەتبار.
بڵاوکراوەتەوە لە لایەن :
پڕۆژەی پارێزەر
